環球唱片噚日喺海逸酒店為李克勤舉行頒贈金唱片同名譽金腰帶儀式，環球負責人陳少寶都有出席，少寶話希望克勤打低全港男歌手，成為今年唱片銷量最高嘅男歌手。
克勤喺旁邊聽到，即刻補鑊話：「少寶講嘢一向有攻擊力，其實又唔使講到打低其他歌手咁大件事，最緊要係可以百花齊放。」
雖然克勤同少寶之前有過爭拗，但噚日佢哋兩個一齊出席宣傳活動時，克勤話：「我同少寶一向都有爭拗，已經慣晒，不過今次我都好滿意公司嘅安排。」
而少寶就話克勤新碟宣傳費一定過七位數字，所以克勤今次都收貨啦！
張耀揚平時拍戲多數都係做惡男或者黑社會角色，最近佢去台灣拍電視劇《愛情白皮書》，就一反慣例做斯文嘅唱片公司老闆，除咗着西裝，就係着斯文嘅便服。張耀揚重透露話因為忙住拍戲，由以前一個禮拜五日、每日做三個鐘頭運動，減少至一個禮拜游兩次水，每次十五分鐘。
莫文蔚（Karen）同王力宏不約而同喺下月十三號去馬來西亞做宣傳。Karen今次係為咗新碟去當地做簽唱會。而王力宏就係為七月十三號喺大馬開嘅演唱會造勢，唔知呢兩個老友到時會唔會喺大馬約會呢？其實今次佢哋唔係特登夾埋一齊去大馬宣傳，只係Karen嘅期一推再推，所以先會咁啱同王力宏撞期。
阿倫譚詠麟對陳慧琳俾歌迷以死威迫相見一事大表關注。前晚佢出席深圳東魅餐廳開幕禮時話：「我以前都遇過呢啲事，以前我有個女歌迷好鍾意織冷衫，有次佢走上寶麗金大吵大鬧，搞住啲保母。我另一個女fans重同人講，話我喺英國同佢結咗婚。肥萍（癡心fans）就理性啦，至少我話佢，佢識得喊。」
安雅日前返咗台灣，今次佢返台灣係為咗傾拍劇同唱片嘅嘢，安雅喺台灣亦都有俾傳媒追問佢之前同梁朝偉嘅緋聞，安雅話：「偉仔係有一對好迷人嘅電眼，但我冇俾佢電到，因為我以前曾經同過明星拍拖，知道同明星拍拖嗰種痛，所以我絕對唔會同圈中人拍拖。」
爾冬陞幾年前執導劉德華嗰套《烈火戰車》後，其實佢一直都想拍續集，但之前中國星計過條數，始終覺得冇乜把握可以收番成本，所以一直唔同意拍續集。𠵱家小寶轉投星皓，其實佢都計劃由星皓投資呢部戲，但成本可能會減到約三千萬，不過佢重未諗到搵邊個做男主角。