今日係世界盃開鑼大日子，我肥師奶已經為老公同啲仔女喺超市入定貨，除咗啤酒汽水薯片呢啲例牌嘢之外，更有多款不同口味嘅小食，不如同大家分享一下我嘅部份戰利品吖！
文：肥師奶
我老公同啲細路好鍾意食蒟蒻，因為佢比啫喱有彈性之餘，又低卡路里。而除咗常見慣嘅果汁味蒟蒻之外，另有蔬菜味道蒟蒻，同樣吸引。呢種番茄味蒟蒻，成份加入咗真番茄，一打開包裝就有番茄味，重加入咗蘋果、士多啤梨、檸檬汁、蘆薈，更加有益健康。我已經預先將佢哋雪至凍冰冰，等佢哋隨時可以冰涼一下。
$16.5/包 崇光Freshmart
百力滋亦好受我屋企人歡迎，最新近嘅口味係嚟自夏天盛產嘅芒果。呢隻芒果百力滋外層香香滑滑，有芒果味之餘，亦帶有一陣陣牛奶香味。而最吸引嘅係呢隻百力滋加入咗芒果乾碎，食起嚟有粒粒芒果肉，更有口感。
$12/盒（10條ｘ2包） 零食物語
呢款牛奶脆果特別為我囡囡買㗎。牛奶脆米外層，包住士多啤梨餡，內裏更有士多啤梨果肉，咬落更有口感、味道豐富。牛奶士多啤梨脆果細細粒，的的骰骰夠方便。
$9/盒 零食物語