世界盃終於開鑼，發展商都唔會錯過呢個宣傳良機，九龍倉響屯門萬能閣翠濤居新設嘅示範單位，特設電視，播放世界盃賽事，提供茶點之餘，重有抽獎，中獎者可以去九龍灣國際展貿中心，全港最大嘅全天候直播室睇世界盃。
房協馬鞍山曉峯灣畔，1124個單位已經賣清，不過佢哋都冇得鬆口氣，因為要趕住交樓。蘭西收到消息話，房協瘦身之後，人手唔係咁多，所以今次驗樓，只得3個同事負責，即係話平均每人要驗差唔多375個單位，重要響短時間內搞掂，真係做到氣咳。
置地同北京萬通合作嘅北京新城國際，早排響北京同香港推出單位發售，兩大集團下個禮拜會搞慶功宴，到時重會講吓兩地嘅銷情，兼響北京引起嘅迴響。
嘉華何文田嘉多利豪園近排賣得唔錯，今日就簽約委任仲量聯行，提供酒店式管理同代租服務。
職業訓練局屬下嘅房地產服務業訓練委員會，響下個禮拜六舉辦研討會，講吓𠵱家內地房地產最新發展情況，重探討內地房地產服務業嘅發展機會。
蘭西