一手住宅早前暢銷，大地產代理行都有錢賺，所以近排不時都聽到佢哋搞慶功宴，美聯物業新界區今日響荔枝角美孚新邨新世界酒樓擺10圍，慶祝荃灣名逸居做到好成績。美聯方面對蘭西講，近呢兩個月，集團已搞咗10幾次慶功宴，主要係新界區（佔10次），而淨係做馬鞍山海典灣都搞咗3次。幾家代理行都搞慶功宴固然開心，但最開心相信係啲酒樓同酒店，因為起碼都有生意做。
由於息口低沉，唔少租客轉租為買，結果令租務市道大受影響，租金持續向下，就算係大型屋苑，月租幾千蚊都有交易，好似天水圍嘉湖山莊，聽講話月租低見4000蚊，但因為供樓支出重平，所以租市都唔係好活躍。
港人購買內地住宅，一向都作自用或度假為主，近一年投資比例開始增加，但究竟內地個租務市場係點呢？睇睇番禺祈福新邨嘅承租個案，都應該可以有啲參考作用。好似綠怡居二樓兩房單位，實用面積546方呎，月租1600元，呎租2.9元；翠湖居三房二樓單位，1560方呎，月租4000元，呎租2.6元；青怡居四房（連套房）二樓單位，1200方呎，月租3300元，呎租2.8元。
蘭西