傅珮嘉不嬲都係慳妹一名，以前佢重試過一日只係使三十元，確實非常慳家，早排佢所屬嘅嘉禾唱片宣布結束，好多人都以為傅珮嘉生活成困，但原來佢已經簽咗黃百鳴嘅東方唱片。
傅珮嘉日前重同兩男一女友人，去咗名廚楊貫一喺銅鑼灣開嘅「富臨飯店」食鮑魚，大擦一番，之後佢哋重行咗去名店街掃貨㖭。
嗰晚傅珮嘉雖然冇化妝，不過見佢心情勁靚，連去幾間名店，包括Tsumori Chisato、Cacharel同Vivienne Westwood等左逛右逛，結果佢喺Vivayou揀中咗件價值一千七百蚊嘅長身花恤，跟住佢再去IT買咗兩條合共三千蚊嘅長褲，傅珮嘉一晚掃貨都使咗成五千蚊，佢忽然富貴，都係因為有唱片公司肯大開水喉，簽佢之餘，又幫佢重新包裝形象，傅珮嘉重唔買番夠本慶祝一下。
郭富城做咗百事代言人後，「百事」二字不離口，佢日前就到美國百事總公司出席周年晚宴，獲百事總公司嘅行政總裁頒發「PepsiMusicHallofFame」大獎作嘉許。城城領獎時眼泛淚光咁話得到此獎實在不枉此生，比佢過往得過的獎項都珍貴，感覺如得奧斯卡一樣，佢話最難忘嘅事就係試過一日內飲咗一百樽百事。
劉嘉玲噚日去天后「德昌魚旦粉」食馳名魚蛋粉。嘉玲同助手各自點了一碗魚蛋粉後，意猶未盡再叫了一客西多士兩人食。嘉玲離開嘅時候，記者上前欲訪問佢，但嘉玲以正在講手提電話為由拒絕，不過嘉玲對記者拍照就唔抗拒，最後坐私家車離去。
謝天華前日出席《皆大歡喜》宣傳活動嘅時候，被劉丹用蠟樽扑頭，誤觸到佢嘅舊患，天華感頭暈即刻扯火離場，連下晝戲份都唔拍。噚日佢返電視城拍攝《皆》劇嘅時候，薛家燕即時慰問佢，而謝天華就解釋自己前日唔係扯火離場，只係因為佢前年炒車撞傷後尾枕，佢話：「𠵱家無乜大礙嘞，我當時唔係㷫，只係覺痛啫。」
成龍𠵱家喺布拉格拍緊新片《贖金之王2》，今次佢喺新片中嘅動作場面會有唔少變化，重會有場邊打邊跳舞嘅武打戲。由於成龍已經多次同外國製作公司合作，所以佢好有耐心教當地嘅演員動作。成龍拍完《贖》片後，喺十月會開拍一套荷李活舊片重拍嘅大製作，不過佢就大賣關子話遲啲先公布。
梁敏儀最近俾英皇點名力捧，英皇喺日本請咗兩位化妝師同髮型師，為梁敏儀設計新形象。噚日梁敏儀喺北角一影樓為新形象影相，佢話雖然起步較遲，但都會努力把握機會，梁敏儀重話將會接受甄子丹嘅動作訓練，接拍一部《俏嬌娃》式嘅動作片。