小初以為炒高息工業股，只係短暫現象，但睇嚟又好似未有咁快玩完。
好似德永佳（321）咁，股價1年內，由唔夠2元，升到噚日6.30元，但有證券行重話佢平，目標要睇9元。小初先至明白高處未算高嘅真正意義。
一間法資證券行，日前亦品題股價升咗唔少嘅建溢集團（638），話佢值3.45元，相對現價2.525元，有超過30％升幅。
同樣建溢股價在1年內，由90仙升上嚟，但重有人唱好，你話小初係咪要重新調整一吓對工業股嘅睇法呢？
不過，小初早排見到建溢有多手大成交上板，收尾發覺係大股東同董事減持，所以有多少戒心。
不過，經紀陳又唔係咁睇，佢話之前德永佳、思捷（330）一樣係有老闆同埋董事大手減持，但股價一樣好硬淨。加上隻股成交唔大，反映大戶都未出貨，所以唔使驚住。
慕容小初