經濟尚未有起色，所有散貨式大減價都可以引起廣大市民的關注，今個星期五及星期六，西田百貨舉行嘅購物優惠日，就肯定哄動師奶界，因為大至家具電器、細至童裝用品都只此兩日狂冧益街坊，不如等小記幫你率先介紹當中必掃正貨，諗清楚計掂數，到時就要快手出擊。
記者：許穗齡 攝影：伍慶泉
香港人生活緊張，一個舒適嘅枕頭實屬必需品，呢款ZeroGravity太空記憶棉無重枕頭，以工學曲線設計，不單止識得感應人體溫度，重有超低回彈力，幫你記住最適合你嘅枕頭凹度，𠵱家破天荒由差不多七百蚊減到$199，絕對係入貨嘅時候。
世界盃開賽在即，相信呢套新款嘅SNOOPY足球床單肯定更加搶手。呢套單人全棉床上用品套裝，包括床笠、枕袋（圖為底及面圖案）及被袋各一，印有SNOOPY同埋朋友仔喺藍天下草地上踢足球，夠晒合時，最緊要係全套只售$199，減幅接近三折。
今次大減價，呢套由睡康寧推出嘅睡房套裝，就由原價近八千大元冧至唔使二千五百蚊就有交易，絕對係全場最筍貨品之一。一套有三件產品，包括連鎖式彈簧床褥、白橡木色強化玻璃櫃桶睡床及同質料鋁邊雙趟門衣櫃，限售50套，二千幾蚊就可以令睡房耳目一新，早啲起身排隊都抵！
開始踏入旅行旺季，係時候買番個旅行喼或旅行袋，呢款尼龍纖維製嘅ELLE旅行套裝，包括一個29吋拉桿喼、一個20吋手提喼和一個15吋旅行袋，三件合共只賣$499，非常超值，無論近近地幾日遊抑或係去足一個月長途旅行都啱用！
雖然已經踏入夏季，不過一個熱水壺點都係屋企嘅必需品，不論係淥杯麵抑或係開奶粉都靠晒佢，今次優惠期就有呢款TIGER氣壓壺平價出售，容量有2.2公升，足夠一般小家庭使用，由四百幾蚊冧至二百幾，絕對買得過。
想為廚房添置新煮食用品，都有不少平靚正嘅貨色等你掃。好似呢款德國Berndes，品質有一定保證，平時買一個煲閒閒地都要成千蚊，今次一個32cm高身嘅易潔煎鑊連7公升嘅雙耳煲，都只不過係$938，「煮」婦們記得唔好錯過啦！
小記非常鍾意呢款童裝睡衣，日本進口全棉睡衣一套三件，包括一件扣鈕短袖上衣、長褲及短褲各一，任你配襯，而且重有多款圖案及顏色選擇，優惠期內每套$69，記得幫仔仔囡囡買番套啦！
天氣開始悶熱，係時候帶小朋友去沙灘游吓水，今次優惠期間，所有Triumph嘅童裝泳衣全線七折，好以呢款一件頭泳衣連泳帽，以藍色為主加上粉紅色花邊，夠晒可愛，記得帶埋小朋友一齊去掃餐飽啦！
小記同嘉嘉一樣都非常鍾意麥嘜，不過佢所出嘅公仔一向偏貴，細細個公仔都起碼過百元，好似呢款布公仔套裝，每隻獨立發售時原價為$168，𠵱家一套4隻只需$99，有齊麥兜、麥太、MissChan同埋黎根，大人細路都必定爭先搶購。
沙田新城市廣場第三期
優惠日期間特別開放時間：
5月31日 9:00am-10:30pm
6月1日 11:00am-10:30pm
查詢電話：26941111