世界盃後日就開鑼，七點半鐘法國對塞內加爾，為咗睇晚上（七點半）嘅賽事，左丁山預備成個月都盡量唔外出食晚飯，所有約會推得就推，各位老友記，請你哋體諒吓呀，如果約左丁山食晚飯，最好預埋電視（有線）睇波。
但係下午兩點半、五點半開波嘅賽事，就好難睇到咯，唔通唔做嘢，等運到咩，點都要上班開工嘅啫。左丁山諗諗吓，想買一架二十一吋電視錄影機擺喺辦公室，行開行埋可以裝吓，㩒吓掣就可以錄影。點知周圍都買唔到，最初以為因世界盃開波，呢類電視錄影機斷晒貨，但後來搵到專家電器李，佢話：「新力、聲寶兩隻牌子已經唔再推出二十一吋電視連錄影機咯，呢類貨太好賣，影響咗新力、聲寶錄影機嘅銷路，於是索性唔再生產。不如你買架十四吋啦。」唓，十四吋咁細，點睇呀。侷住要買電視機、錄影機，駁線先至得，好鬼煩。回心一諗，寫字樓冇有線電視線路噃，得物無所用㖭。香港喺呢方面真係落後到暈，記得喺美國大城市嘅大廈，買架電視機插埋機掣，立即可以睇有線電視，都唔知幾方便，香港號稱亞洲世界城市，其實有好多嘢都落後過人，一啲都追唔上世界城市水平。
既然返工冇得睇，惟有聽住收音機或者上網睇結果，聊勝於無。下一屆世界盃喺德國舉行，到時唔使返工時份都心思思！