鄧麗君去世已經七年，不過每年都重有好多歌迷為佢搞紀念活動。前晚一班歌手同藝人包括容祖兒、黃伊汶（Dior）、傅珮嘉、田蕊妮、周蕙同早前參加鄧麗君模仿大賽嘅得獎者，一齊喺尖沙嘴文化中心出席「忘不了鄧麗君紀念音樂會」，獻唱鄧麗君首本名曲，鄧麗君媽媽同細佬鄧長禧都有去捧場。
演唱期間重發生咗小插曲，當Dior表演時，佢唱到一半突然冇晒音樂，不過佢依然表現鎮定，將成首歌清唱到尾，全場觀眾拍住手幫佢打拍子，Dior亦冇令人失望，完全冇走音。清唱唔走音，唔係咁容易，估唔到Dior執生能力都唔錯，重順便表現埋實力㖭。
活動上重播咗一段未曝過光、鄧麗君年輕時嘅生活片段，但播放期間，坐喺樓上側邊位嘅小鄧迷因為個位太側睇唔到，好不滿咁大聲投訴。其中一位男觀眾重激氣到講晒粗口大叫大鬧，最後重拖住老婆憤然離場。
張慧儀噚日喺新城電台接受《家天下》主持薛家燕嘅訪問，期間薛家燕提及當年張慧儀同盧慶輝嘅一段情。對於被家燕姐舊事重提，張慧儀表示唔介意，佢話：「我同家燕姐由《真情》識到𠵱家，都冇乜嘢唔講得，而且家燕姐份人都好有分寸，但過咗去嘅感情亦唔想回頭望。」被問到𠵱家嘅感情生活，張慧儀話：「感情事可遇不可求，要嚟嘅時候好似坦克車，擋都擋唔住，不過暫時重未有坦克車衝埋嚟。」
唐文龍噚日喺西貢早禾坑同佘詩曼（阿佘）出海，為無綫劇《帝女花》拍外景。早前有雜誌話唐文龍喺拍《帝》劇期間博阿佘懵，噚日佢哋出外景時不但有傾有講，重大方合照㖭。不過唐文龍可能始終有啲避忌，同阿佘落船嗰陣都唔敢扶對方，可能怕又俾人亂咁寫啦。
台灣歌手王力宏日前喺台灣拍咗個眼鏡廣告，佢着住背心喺沙灘，一邊打鼓，一邊拍廣告。王力宏話自己十幾歲時因為貪型，所以走去學打鼓。王力宏呢次喺廣告裏面扮一個音樂人，佢揸住架四驅車去沙灘，又真係幾有型有款嘅。
有「車神盲亨」之稱嘅詹昌盛，噚日帶埋老婆同六歲大嘅仔，喺小欖香港賽車場開記者會，宣傳VCD《車神盲亨再起風雲》。問佢覺唔覺得撞車之後搵人頂包係好蠢？「盲亨」話可以咁講，其實撞車冇傷人係好小事，最多告危險駕駛。警察會到場查，一定過唔到骨嘅。
剛完成康城影展評審工作嘅楊紫瓊，最近就新片《天脈傳奇》喺法國嘅發行權，控告法國嘅電影發行公司M6/SND，原因係楊紫瓊指當初呢間公司應承會做《天》片嘅發行，但係遲遲都未行動簽約，令電影造成好大嘅損失，所以佢𠵱家已經將事件交畀代表律師負責，以追討賠償。