新一輪醫學會選舉又開始，副會長朱建華醫生決定去馬，挑戰現任會長勞永樂醫生。
朱醫生名副其實係票王，佢喺較早時立法會選舉委員會得嘅票數係醫學界最高嘅，加上佢𠵱家已經搵咗好多唔同背景嘅醫生支持佢，睇嚟「勞朱之爭」必定十分精采。
話說朱醫生喺上一次選舉嘅時候，重係支持勞永樂參選會長；點解佢今次又會出嚟選會長呢？佢話因為覺得𠵱家勞醫生身為會長，又做代表醫學界嘅立法會議員，兩者之間一定有衝突，以前梁智鴻醫生都試過做醫學會會長，同時又做立法會議員，真係有啲問題，後來梁醫生亦唔做會長，由方津生頂上。
加上近排勞醫生同衞生福利局局長楊永強針鋒相對，對業界發展未必係好事，所以朱醫生就喺兩、三個星期前決定自己出嚟選會長嘞！佢𠵱家已經搵到唔少同行支持，好似醫療界前輩鄔維庸、楊紫芝、招顯洸、梁智鴻，公共醫療醫生協會嘅葉維晉、黎鏡堯，港大醫學院院長林兆鑫、中大梁秉中，同私家醫生蔡堅、史泰祖等，陣容都好鼎盛。
八方問到勞醫生此事，佢話唔評論醫學會選舉嘅事。不過，據業內人士話勞醫生應該會再參選。選舉嘅投票信會喺下個月中發畀五千個醫學會會員，由佢哋決定邊個最適合做下任會長。
傳真︰2623-9278
電郵︰