中港大融合是不可阻擋嘅大趨勢，唔少測量師行同地產代理公司都加強內地業務，內地主要城市嘅物業報告愈嚟愈多，中原（中國）最近都出咗一份報告，除咗介紹主要大城市嘅市況外，兼用表列出供應量同租售價等數據供參考，較特別係響每個城市都再細分為中心區、次中心區，以至城市邊緣同郊區等。
嘉里嘅大埔滌濤山已經攞咗滿意紙，14日內會交樓，發展商將開放全新示範單位，重會安排記者坐直升機睇樓，從另一個角度感受吓個盤嘅特色。
新昌地產管理公司最近被房委會評選為「最佳商場管理公司」，而且係第一次參加呢個選舉就攞獎。呢個比賽嘅評審標準，係根據管理公司嘅商場人手安排、保安、清潔、維修、小販控制、財務安排、財務控制同商場推廣活動等而釐定，其間房委會會有兩次突擊檢查。參加嘅公司要攞呢個獎都唔係咁容易。
灣仔明珠興業中心20樓正透過中原招租，單位7388方呎，呎租叫價13元，月租約9.6萬元。單位有裝修同埋會議室，租戶可以即刻搬入去。
蘭西