前日經紀陳話香港葯業（182）經外資行品題，可能有機炒一轉。小初噚日一早就上車，真係估唔到晏晝就落得車，玩即日鮮都執到多少，實在太過高興。
小初贏咗錢請經紀陳食晚飯，順便又問吓佢有咩好介紹，佢講咗隻極冷門嘅工業股利豐雅高（623），話隻股近期有人密密收貨，股價有異動，可以留意吓。
利豐雅高上個月公布業績，蝕咗成9500萬元，但股價就由80仙水平升到噚日1.06元，雖然成交唔算太大，但似係有「鳳凰盤」落場。
經紀陳話，隻股有兩個傳聞，首先係公司舊年賣咗盤，新老闆清理舊帳，撇哂以前啲數，所以先至蝕得咁多，以後帳目就會好好睇，可以炒復甦。
另一個傳聞係公司再次放盤，早前公布業績大撇帳，係做靚盤數。
無論邊個傳聞係真，單睇股價表現，都值得小初睇多眼。
慕容小初