美國前晚休市，港股本來已相當淡靜，點知重加埋期交所下午死機，令到現貨市場嘅對沖及套戥盤交易大為減少，港股成交跌至58億元，創近期新低。
大部份期指轉倉及平倉盤將會谷埋喺呢一兩日做，今個月期指結算可能會頗為波動。
友聯建材（432）噚日一度急升約60％，升至4.5仙，其後升幅收窄至39％停牌，公司話要配股集資。早前有消息話此股會借大量發行新股畀投資者順便賣埋個殼。
不過，黑客話市傳今次配股只係配畀自己友而唔係賣殼，主要因為幕後人士認為現時股仔炒風暢旺，因此想批手貨出街炒作，睇吓可唔可以將隻股炒到翻生。
威高國際（1173）噚日下午傳出有人被斬倉，股價一度下瀉28.2％，低見0.178元，其後又傳出大股東低位出手接貨，股價收報0.187元，跌24.6％，成交金額2603萬元。
Cookie話，此股3月中由0.10元乾升至0.25元，升幅達1.5倍，但一直冇咩散戶跟進，幕後人士散唔到貨，加上近期缺水，所以有證券行見勢色唔對就一於斬倉。
中國航空技術（232）噚日停牌表示要配股，原定配售價介乎0.15－0.20元，但由於市場反應欠佳，因此可能會以接近下限0.15元定價。如果真係咁，即係大幅折讓40％配股，咁樣賤價配股，不如叫股東供股好過。
阿 虎