為了推廣香港同山東的商貿往來，駐京辦在濟南搞咗個「山東．香港周」；濟南風光明媚，去參加盛會的香港官員當然唔會放過遊玩的機會。
梁錦松、葉澍堃、梁振英、梁寶榮四個大男人，昨日朝早一去完開幕儀式，放完白鴿之後，就走咗去濟南出名的趵突泉玩，個個除晒西裝，着住件白恤衫，十足十學生去旅行一樣，主人家山東省省長張高麗亦相陪在側。
行到咁上下，有人大發雅興，唔知在邊度搵來一本宋代詞人李清照的《漱玉堂詞集》送畀阿松，阿松亦都吟番兩句：「尋尋覓覓，冷冷清清，淒淒慘慘戚戚」。
講開山東，阿松昨日在一個午宴上致辭時就話，在改革開放之前，外國人認識山東甚至認識中國，係由兩個相距二千幾年的名字開始，一個係孔子，另一個就係青島啤酒，原來山東人好早就掌握名牌效應。
﹙圖﹚阿松（伸手者）在濟南暢遊名勝古迹。
傳真︰2623-9278
電郵︰