找劉錫明做訪問，因為聽朋友說他將會在大陸出雜誌。訪問當天，他說他不但出版雜誌，還正在籌備推出一本講述命理的書籍，滔滔不絕地從十多年前參加新秀開始講起，怎樣成為電視台力捧的新星，怎樣在台灣冒出頭，又怎樣為其他人推算運程。不過提起當年被雜誌改花命害得要命，及跟陳勳奇的錢銀轇轕，他只淡然地說：「阿媽教我做人留一線，日後好相見，凡事唔好去得太盡，得些好意須回手。」
記者：曾順珍 攝影：楊錦文
如果劉錫明去做DJ，相信不少人都會舉腳贊成，因為他說話多多，對事情描述得詳細，而且還會扮當事人去演繹每一句說話，令人留下深刻印象。
本想問他關於他在六月於大陸出版一本消閒雜誌的事，怎料他一開始便說：「我有一樣比搞雜誌嘅消息更新嘅，就係我會喺今年年尾出一本講命理、八字同紫微斗數嘅書，呢個都算係我一大突破。」他很興奮的繼續說着：「我出書係好偶然嘅事，因為我幫一個出版商算命之後，佢覺得我好準，於是問我有無興趣出書。我諗好多人都會覺得我唱歌就得，出命理書好似有啲奇怪，但其實我對命理研究咗好多年喇。」
劉錫明話自己被命理吸引的原因，是當年因跟華星解除合約後，在無聊無事做又無錢的情況下，便找一位70多歲姓伍的盲公批命。
「當時阿伯話我上半年會窮到連兩餐都成問題，但下半年事業又會有唔錯嘅轉機，另外我會跟女朋友分手，而阿爸健康會出現問題，結果佢全部講中。」
那時候劉錫明有份拍的電視劇集《義不容情》出街後有不錯的反應，第二年他便被無綫選中成為力捧的新星，跟着便陸續拍攝《還我本色》、《天龍奇俠》等劇。因為89年事業開始一帆風順，劉錫明就帶了不少人去找盲公指點迷津。
「嗰時我帶咗差唔多100個人畀佢批命，當中有Sammi啦、梁詠琳啦。因為盲公係個盲人，佢就教我幫佢寫命盤，於是我就係咁開始幫佢寫咗差唔多成百個命盤。可能聽佢講命講得多，唔多唔少都會偷到師，於是我開始對命理有興趣，重不停睇有關嘅書籍去增進知識。」
劉錫明說自己沒有拜師學藝，所有對命理的知識全是靠自己摸索得來。
「我無拜師㗎，從92年開始，我就睇書學習，然後不斷靠驗證去改進，即係幫人批完命後，就問吓佢究竟講得中唔中，中就啱，唔中就諗吓點解，呢啲嘢係要講領悟嘅，好難同你講得明究竟其中係點樣。我有幫幾百人批過命㗎，當中有朋友、家人，連唔識嘅都有，但係我統統唔收錢，因為呢樣係我嘅興趣嚟。我研究八字、紫微斗數都有十年，有無說服力？咁你咪睇吓準唔準囉！最主要都係有準確嘅時辰八字，咁先可以批得準。」
97年當劉錫明和林心如一起拍《上海探戈》時，就批林心如條命不錯。「我唔係好記得話佢有十年抑或二十年嘅靚運，佢嗰時重話畀我知佢會拍《還珠格格》，但我估唔到佢紅得咁緊要啫。」另一個係一位知名的台灣監製（劉錫明不肯講是哪一位），劉錫明話自己一睇他的八字，便知道他將會結婚，而事實上那位監製真的在那年結婚。
既然批命咁準，那麼有沒有也為自己算過命？劉錫明耍手擰頭的笑着說：「𠵱家無喎，呢啲叫能醫不自醫嘛，因為有時批咗出嚟，自己都未必相信。好似我95年喺台灣嘅事業非常順境，嗰年我嘅唱片賣過二十多萬張，年尾重攞十大偶像，但我算到自己第二年嘅事業會好差。初時我點都唔信，覺得無理由會仆，點知第二年我嘅唱片公司將我嘅合約賣畀另一間公司，而呢間公司又遲遲都唔幫我出唱片，搞到我嘅事業停滯晒，你話係咪好令人難以置信吖。
「批流年、流月你聽過喇，我以前玩到批流日，即係每日都會算吓有乜事會發生，搞到個人成日疑神疑鬼。例如有一日我算到有人請我食飯，咁我就周圍約人食飯，但最後都要一個人買飯盒食，點知就係賣飯嘅老闆娘認得我，叫我簽名之餘重唔收我飯盒錢，我先知道原來係佢請我食飯。所以我唔贊成人哋玩流日，因為會好影響日常生活，我𠵱家唔會再幫自己批囉。」
一向都覺劉錫明是很招惹是非的人，91年因有傳追周慧敏而被封「毒瘤明」，弄致在港事業停滯不前，之前又話搞大前度女友個肚，最近又傳跟陳勳奇有錢銀轇轕，對此他無奈地說：「我本命係多是非，惟有喺做人處事上要更圓滑。不過話行衰運咩，我又覺得視乎你點睇，咁如果我唔過台灣就唔會識到我老婆，我嘅眼界亦唔會擴闊咗好多，今年嘅十月我重會做爹哋㖭。至於陳勳奇，我會話佢係一個值得交嘅朋友，話我欠佢錢係假嘅，其實係佢倒轉欠我幾十萬尾數，但大男人費事斤斤計較，我嘅思想係用嚟做積極性嘅事，如果我要搞嘢十年前已經搞咗啦。你知唔知乜嘢叫忍呀？忍得到嘅唔算忍，忍無可忍還要忍嘅謂之忍呀。」
可能劉錫明說得對，如果他不到台灣發展，也未必會寫關於命理的書籍，或推出新雜誌。
「呢本雜誌係我、楊得時和一個大財團合辦，籌備咗都有一年，個Idea係時仔諗嘅，你知啦，中國入咗世貿，第日個市場有好大潛力，我哋都認真考慮過先至去做，而我會負責宣傳方面。本雜誌其實係以免費VCD形式發行，內容主要環繞吃喝玩樂，亦有娛樂資訊，但唔會有狗仔隊玩跟蹤，亦唔會用嚟攻擊他人，因為我覺得『廣結善緣』好重要，阿媽教我做事唔好去得太盡，得些好意須回手，做人留一線，日後好相見嘛。」
最後問劉錫明有無算過自己將來的運程，他煞有介事的話不可以公開透露：「我唔可以講㗎，總之我呢啲人唔會發得去邊，亦唔會死得去邊，永遠有錢使有工做，比上不足比下有餘，做事只要有滿足感就係最重要。」
劉錫明小檔案
英文名：Canti
出生日期：1964年7月16日
學歷：大專
入行經過：1987年新秀歌唱大賽銀獎
推出唱片：你怎麼拾得我難過、一生全屬你、MOSHIMOSHIMOSHI、等愛的人、原諒、把你交給誰才不後悔等
參與電視電影：義不容情、還我本色、烏金血劍、飛越危情、人鬼未了情、靈山俠侶、快活谷、上海探戈等