多得超人唔少，近排股仔個名凡有「生化」兩個字都炒得一餐飽。講真句，小初同好多炒家一樣，根本唔知間公司做乜，但因為有炒家落場炒作，所以跟風玩吓短炒，呢個時勢唔炒，真係唔知要等到幾時先再有咁嘅氣氛。
噚日小初同經紀陳發覺香港葯業（182）同埋鈞濠（115）可能有機會炒上。
香港葯業前身係南北行，舊年喺上海收購咗一項生化技術業務，同埋一檔連鎖藥業，但咁都可以獲得某外資大行推介，話佢值2元。經紀陳說因為有大行品題，可能有炒家肯出錢炒上。
另外，鈞濠早排發新股同現金，買咗檔治癌藥品分銷商，公布收購後，股價唔見太突出。經紀陳話，皆因現時重搵緊人揸鑊鏟，所以隻股先至未見異動。
小初則覺得鈞濠以往曾經玩過一次笨豬跳，除非新炒家技藝高超，或者水頭充足，否則要炒上會有一定難度。
慕容小初