行政會議成員唐英年形象一向都成熟穩重，成個乖乖仔咁款。不過佢阿媽噚日竟然不停倒唐少米，大爆佢童年瘀事，又對佢可能做官大潑冷水。
原來唐少同兩個兄弟，細個非常「奀皮」。有一次三個奀皮仔重喺天台放滿水當泳池玩，咁反斗，結果當然俾阿媽鬧到飛起。好彩唐媽媽教仔女好嚴格，所以大個咗都生性成才。
講到唐少會做問責高官，唐媽媽直言唔贊成。原因係除咗怕大家見面機會少咗之外，唐媽媽數埋手指：「一做就要五年，重要多一年過冷河，六年唔掂得自己生意。商場好現實，到時人家都唔記得你啦！」佢又覺得啲官𠵱家已經好難做，以後重辛苦。個媽咪雖然為個仔事業着想，不過都坦言「仔大仔世界」，唔理得咁多，重話應該好快會有宣布。
唐太年紀唔輕，但keep得好fit，佢有一半蘇州美女血統，從來唔信廣東湯水，生四個細路連坐月都唔使，身材幾十年如一日，都係一百零八磅，淨係生BB時增到百二磅，一生完就極速收身，原來全靠朝朝早原地跳五百下。
噚日佢出席一個婦女活動，男司儀話佢樣靚身材正，似唐少太太多過似佢媽咪，搞到唐媽媽不知幾開心。
傳真︰2623-9278
電郵︰