世界盃喺星期五開波，全世界除咗美國加拿大係足球嘅化外之民外，幾十億人都會吼到實，掛住睇電視。今屆世界盃有一個特點，就係各國傷兵特多，德國後防主將唔踢得，法國球星皮里斯唔掂，亨利亦可能錯過盛事。英格蘭中場之中，碧咸、畢特、戴亞、梅菲都係傷兵，唔夠運嘅話，英格蘭成條中場線都會崩潰。
上星期與身在矽谷嘅生化投資專家L講起，佢話美國科學家開始用西方可以接受嘅科學方法研究中藥，發覺中國馬家軍訓練長跑運動員時候，要運動員服食冬蟲夏草，經美國實驗室數據鑑定，冬蟲夏草確有提升身體器官功能，增強抵抗力，降血糖嘅效果，但佢哋唔敢肯定，呢啲功效可以維持幾耐，是否一停食，體質就會轉弱呢？
專家L來自香港，對世界盃好有興趣，可是美國傳媒絕少報道，電視台亦冇轉播，搞到佢心思思。各位球迷喺六月份，千祈唔好到美加國旅行呀，否則好吊癮。專家L講到冬蟲夏草、烏豆水，認為英法德各國球員（尤其是中國球員）應該服食，包保唔係違禁藥。但係佢有一位台灣朋友，五年前體弱多病，聽人講冬蟲夏草，於是每日食，身體轉弱為強，冇晒病，於是逢人介紹冬蟲夏草。但今年意外受傷生病，出院之後，竟然發覺身體孱弱，食番冬蟲夏草都唔掂。專家L想起美國的小實驗報告，懷疑冬蟲夏草會唔會係「刺激劑」，令身體透支過咗一段時期就失去作用。呢個咁深嘅科學問題，正等待科學家解答。