美股反彈咗兩日，上周五又再跌過，杜指跌111點，收10104，納指更跌逾2%，收1661。
上周二，好友逼近萬二關，臨門一腳俾標普擋番出嚟，跟住就形勢逆轉，輪到淡友反攻。目前市場氣氛轉淡，今個禮拜期指結算，好友能否守喺11600之上結算，趙飛雲亦開始有啲擔心。倉內嘅恒指Call輪9045仍照原定計劃，恒指如果跌穿11497就會先止蝕。
趙飛雲4至5月份集中炒藍籌輪，原因係希望恒指有機會升破12000點重大阻力位，確認重展牛市升浪。但港股上周開始發出轉勢訊號，後市可能回復較窄幅嘅上落市，炒輪吸引力下降。
5月將盡，7月有兩個概念可以憧憬，一係長實（001）分拆長江生命科技上市嘅生化股熱潮；二係QDII（內地認可專業投資機構）有機會公布落實。趙飛雲唔識生化股，所以興趣唔大，但QDII則有得諗，雖然目前好多嘢都未知，但一旦落實，相信會有一定資金流入相對內地A股便宜嘅中資股。
睇番過去兩個月走勢，國企指數明顯跑贏紅籌指數，紅籌股有追落後概念，而且大戶收集紅籌迹象亦見明顯，唔排除亦係為QDII做準備，紅籌股已有留意價值。
趙飛雲