碧咸就算喺英格蘭首場分組賽對瑞典上到場，應該都缺態，搞到史高斯要孭晒飛；咁樣睇嚟，英格蘭領隊艾歷臣真係求神拜佛，史高斯啲哮喘千祈咪發作。
𠵱家英格蘭條中場線天殘地缺，除咗有謝拉特同梅菲因傷退隊，碧咸或戴亞就算落到場打，都唔會有狀態。如果連唯一健全嘅史高斯都有乜頭暈身㷫，睇怕英格蘭唔使旨意出線次圈。
之但係，記得史高斯話喺上屆世界盃對阿根廷場十六強賽事，因為哮喘發作，搞到演出喺水準之下，結果中途被當時領隊荷杜換咗出嚟。
史高斯𠵱家喺英格蘭除咗要負責進攻之外，重要幫手分波同防守，工作量咁大，我求大俠真係擔心佢哮喘復發。若然艾歷臣唔想喺下月中首圈出局，同隊波一齊執包袱返英國，真係要去日本啲廟幫史高斯作個福。
「巨無霸」奧尼爾對於最近美國傳媒同各隊嘅經理人不斷咁向姚明大肆吹捧，好睇唔過眼（或者係嫉妒），佢指姚明連一場NBA都未打過，就將佢捧到好似超級巨星咁，簡直離晒大譜。佢重話到時將會用手踭嚟好好招呼我哋呢位中國上賓。
不枉我求大俠噚日晨早起身睇塞爾特人對網隊場波，睇咗三節睇怕塞爾特人死硬，點知佢哋最後反敗為勝。不過原來塞爾特人反勝背後有段古，就係第三節完結後，網隊班後備樂極忘形，笑聲大作佢哋個班主比賽中途接受訪問，好似贏硬咁，激到塞爾特人球員向網隊狂攻發洩，又一次證明驕兵必敗！
我求大俠早幾日話過，法國前鋒亨利嘅膝傷並唔係其他報紙講得咁嚴重，而事實證明亨利喺禮拜日對南韓場友賽以正選身份上陣，重有呀，亨利係法國嘅主力，就算佢真係因傷而趕唔切喺揭幕戰上陣，相信拿美爾亦唔會Out佢。
施薩馬甸尼嘅太座講明，如果老公教嘅巴拉圭響決賽周遇上個仔踢嘅意大利，佢就一定要仔唔要老公，死都捧意大利咁話，而佢個女都係咁諗。係人都知「老馬」已經唔受巴拉圭球員同球迷支持，如果佢隊波真係對住意大利，到時真係眾叛親離，成為孤獨老人囉。
早排有位世界盃嘅工作人員，因承受唔到壓力而自殺死咗，日本方面就即刻話下次唔再辦；但世界盃四年一次，重要輪流由唔同洲嘅國家主辦。亞洲想再成為主辦地方，起碼要等十年、八年。就算輪番亞洲，輪都輪到中國啦，所以話呢，日本邊有咁容易再辦世界盃呀，諗佢哋都係一時之氣啫！