好耐冇見袁人祥，一見面即刻爆料，佢話日本「九號仔」同「濕水中的馬騮」成大批店員連埋總舵主來港旅行，同行重有靚到流鼻血嘅「醒目」女模特兒，十分醒神。原來佢哋正進行春季大旅行，因為剛剛忙完黃金假期冇假放，呢次旅行就當補假。咁體貼嘅老細都有，唔怪得咁多人恨入去做。袁人祥能知所有裏原宿事，不愧為裏原宿叔父。
聽講佢最近返hTM撈咗筆，連緋聞E都幫襯佢，袁人祥當然例牌否認，果然謙虛。不過佢對hTM有獨特見解：「聽聞對『烏粉砵』英國反應唔及日本，而且又陸續出『科士』、『登』款，雖然係限量，但太刻意囉，俾人感覺過份計算，班客反而唔接受。同以前『烏粉』失驚無神爆出嚟相差好遠，今次宣傳伎倆太虛喇。」袁人祥邊講邊手舞足蹈，十分大動作。
不過亦有水貨商人同袁人祥唱反調，話雖然今次對「烏粉砵」冇預期中咁好炒，但始終有獨立編號，等一排定可價格反彈。其實信邊派都好，如果對鞋自己鍾意，炒唔炒得都冇所謂。
主持人：大食Jack
八卦熱報：