失業率再升，是意料中事。傳媒循例訪問經濟分析員，得到的評論是：預期失業率已經見頂。
見頂，聽落是好事。專家的意思，大概是說失業率已經攀上額菲爾士峰的K2頂，就算失業大軍中不乏卧虎藏龍、輕功叻過李慕白的武當高手，一樣不可以更上一層，只能原地踏步或者往下走。
見頂，等於見到光明，無限風光在頂峰。不過對熱衷服務特區，叫特首做老闆的政務司司長而言，忽然宣佈見頂，仕途就係咁大。高官問責，乜無預埋佢一份咩？即刻panic，驚恐到雙手發軟，頭頂金星直冒，發錯新聞稿。
保安局局長也不願意見頂，頂上禿禿的鏟青流行髮型，保安局長一日在位，打死也不會梳。問她拘捕長毛等人的訴訟見頂未呢，她會好整以暇，用鮮紅色指甲撥弄堅硬的燙髮，從豹皮手袋掏出黑超架上，一邊睇Time周刊一邊信心爆棚說：咩頂？無論點頂，我都未驚過。
警務處處長的車牌號碼是無敵一號，擺明是紀律部隊老頂，廉記老幾？一哥勝在根正苗紅，論資排輩，廉記無可能超越一哥的江湖地位。不過《壹週刊》剛好也是阿一，雖然謙稱自己是一仔，但依然成為眼中釘，難怪處長上立法會出示雜誌時，肉緊到用手夾實個「壹」字logo。如果他有訂閱《蘋果日報》，也許要吩咐秘書，見敝欄兩個頂字，即刻刪掉。否則，個肺會揦住。