「中葡大戰」落幕，霍震霆噚日返咗香港。舉凡有關體育嘅問題，個個記者都追住佢問，小霍已成個「體育部長」咁款。講吓講吓，講到董特首喺澳門被人勁噓，小霍即時瞪大對眼，好尷尬咁笑住話：「噓佢？唔係支持佢咩？」乜小霍覺得嗰啲係濠江球迷為阿董打氣嘅歡呼聲？小霍隨即轉口話：「我唔知道嘞！」睇嚟佢唔夠阿爸霍英東咁「挺董」喎。
其實將噓聲當掌聲者大有人在，以前有來自國內嘅美女利智，最近因性愛光碟「紅」遍華人社會嘅台灣靚女政客璩美鳳，都一樣將噓聲當掌聲，泰然自若。阿董既然「冧莊」做多五年，都要好好學習一吓呢樣奇技，因為咁嘅場面未來五年隨時會再次發生，到時重好似呢次咁尷尬，就失禮死人喇。
講開阿董被噓，小霍興起之餘重講咗個有關球賽嘅笑話，佢話球迷其實乜都假，最緊要開波。佢個笑話係講德國有場波，球賽秘書長漏咗請嘉賓致開幕辭，心諗今次死啦，實俾人鬧。點知第二日報紙大讚呢場波嘅開幕禮係有史以來最好，因為冇又長又臭嘅儀式阻住地球轉。阻住睇波已經大罪，何況阿董阻人發達，小霍講完個笑話，八方更明白點解阿董獲得如此「禮遇」！
傳真︰2623-9278
電郵︰