鎖住唔少炒家資金嘅光通信（603），終於今日復牌見人，但係佢收購中國發展（487）一事，就話因為條件傾唔掂所以唔成。
市場其實最關心係光通信天然氣合資項目，會唔會真係取消，但通告中就隻字唔提，搞到小初個心十五十六，都唔知今日點算好？
小初上周講過，光通信係現時炒股嘅龍頭，一上一落都有好大啟示，佢今日復牌冇好消息，街外跟風揸重貨嘅炒家唔少，一旦沽貨，真係唔知班上海炒家接唔接得住，就算有殼王同和黃（013）個大名照住都係咁話。所以上周五經紀陳話停牌配股嘅四海互聯網（755），復牌之後可能有料到，但小初唔會輕舉妄動，睇埋今日嘅環境至打算。
聽講四海互聯網自從換咗新主後，一直都想配股，今次佢落實以每股32仙，配售3.5億股新股，集資1.12億元。通常配股後，新股一日未出籠，股價都會頂得住兼且有搞作。
慕容小初