李蘢怡（Tiffany）、谷祖琳、何韻詩、黃伊汶、Shine等一班年輕歌手噚日喺將軍澳新都城商場幫「萬糭同心為公益」活動義賣糭子，重吸引咗幾百人圍觀，佢哋喺短短四十五分鐘裏面賣出一千隻糭子，總共籌得二萬元善款。
谷祖琳同黃伊汶噚日分別着上小背心出現，惟獨擁有36D上圍嘅Tiffany就包到密密實實。Tiffany話：「我係保守派嘛，呢個係我形象嚟。」在場有人即指Tiffany以往亦曾穿小背心出席公開場合，佢即時自辯話：「我又唔係着低胸背心，況且我𠵱家啲衫有贊助嘛，可以等我每個月慳番幾千蚊服裝費。」
此外，Shine組合中嘅徐天佑𠵱家重趕緊拍同蔡卓妍（Charlene）合作嘅電影《這個夏天有異性》，天佑話有次拍戲，臨到現場俾人包裝到成件禮物咁款。
天佑話：「當時一埋位就俾人整到成身禮物紙同蝴蝶結，我都唔知發生緊乜嘢事，之後先知原來係Charlene諗出嚟㗎，可能佢想同我玩，整蠱我。」
韓星閔寬泓（Ryu），噚日嚟港為《冬日戀曲》大碟做宣傳。Ryu一到港就去咗旺角信和中心一間唱片店舉行簽名會，吸引咗二十多名歌迷排隊等簽名。
Ryu話最喜歡香港歌手王菲同黎明，佢話：「我聽過王菲唱嘅歌，感覺好好，希望可以同佢合作。」Ryu話今次嚟港除咗為大碟宣傳外，重希望打開香港市場。
杜德偉（Alex）噚日下晝喺機場出現，佢話喺西安做完嘢返嚟，Alex重話自己都有聽到華航空難呢單新聞。
Alex話以前成日都要去台灣做嘢，所以經常都會搭華航，因為貪佢班次夠密，但後來見華航發生過幾次意外，所以以後就轉搭國泰安全啲咁話。
台灣藝人何潤東最近接拍咗一套日本電影《T.R.Y》，呢套戲係改編自一本日本暢銷小說。
何潤東會同日本演員織田裕二合作，何潤東喺戲入面飾演一個殺手，劇情會安排佢殺織田裕二。因為劇情需要，何潤東重會以女裝打扮出現。
台灣新人梁靜茹噚日以一身便服打扮喺香港機場出現，在場都有成二十幾個fans接機。佢對記者嘅提問都一一回答，態度相當友善，佢話自己啱啱喺上海做完宣傳嘅工作，至於今次嚟香港最主要係出席商台舉行嘅活動。
梁靜茹呢個新人喺台灣以實力見稱，唔知佢今次殺入香港樂壇，歌迷受唔受呢？
馮仁昭前日晏晝喺楊貫一嗰間富臨飯店撞見白韻琴（白姐姐）同謝偉俊（Paul），白姐姐即刻同馮仁昭訴苦，話佢喺美國有七間物業，透過一個經紀出租同埋供款，點知最近個經紀冇同佢供樓，搞到銀行要將佢其中一個單位攞出嚟拍賣，白姐姐惟有趕快飛去美國搞清楚件事。