國足今次逗留南韓濟州近二十日，當然帶備大批物資壓境，酒店方面須租用兩個貨車運載，發現其中有兩箱為鹹蛋，最奇怪的是有一箱竟是二十九吋電視機，莫非有球員嫌酒店房電視唔夠大？
中國隊一個月內兩次到南韓，記得上次呢班大哥喺仁川國際機場時，米路就俾過百南韓記者圍攻，今次呢班南韓老記全部喺晒水原採訪法國對南韓，唔得閒到濟州圍攻米路，難怪佢老人家由機場到酒店都笑容滿面，一身鬆晒。
中國記者團陣容同樣龐大，據講首兩批記者團人數已有二百多人，重未計其他單獨前來的記者，所以當國足新聞官董華發布球隊操練時間，都有大批記者包圍，場面墟冚。
今次中國隊到南韓參加世界盃決賽周，南韓主要電訊公司KTF（南韓電訊），特別贊助每一位球員一部韓國製手提電話，重免費任用，難怪戴着最流行黃色太陽眼鏡的國腳李瑋峰一抵達濟州國際機場，就即刻開始煲其電話粥，唔知「師哥」今次同邊個講電話咁入神呢？