我肥師奶對於各國菜式都好感興趣，所以今次見到有一個意大利美食節，都忍唔住要去見識一下。呢個美食節嘅食品範圍都幾廣闊，由新鮮空運嘅意大利蔬果，至芝士、醃火腿、酒和各式小食都有。而且重有新鮮出爐嘅薄餅賣，都幾多嘢睇，大家不妨去行吓。
文：肥師奶
攝影：林栢鈞
平日街市見到嘅番茄，來來去去嗰幾種，而且好少係由意大利嚟嘅，所以今次我肥師奶當然要睇吓意大利番茄有幾唔同。終於俾我發現到呢兩隻外形都好特別嘅番茄，外形似南瓜嗰隻叫Merindatomato，而長條形似茄子嘅就叫PomodoriInsNazionali，兩種都係適合用來生食嘅番茄。我肥師奶就推介Merindatomato多啲，因為食落最甜，重有少少似士多啤梨嘅味道。做沙律都啱食。
醃味蔬菜乾烹調最適用
煮意大利菜好多時都要用好多香料來醃啲材料，好似我呢啲平日不太常煮意大利菜嘅人，要我煮就真係頭痛。不過好彩俾我搵到呢啲醃蔬菜乾好幫手。呢啲蔬菜乾有茄子、小黃瓜、紅椒同番茄，每樣都經過特別醃味加工，按說明浸軟後就可以煮，由於已醃過，所以不用再加好多調味，方便好用。
喺美食節期間，會場內都擺設咗好多試食攤位，好似芝士、餅乾、朱古力、果汁，連熱辣辣香噴噴嘅薄餅都有得試食，大家可以試清楚啱唔啱食先至買。
晚餐現金券： 在美食節舉行期間，買滿$100就可以得到一張ILVENTORestaurant&Bar的$50晚餐現金券。買嘢又有贈券送都唔錯。詳情請參考會場內單張。
地點：銅鑼灣時代廣場地庫一層city'super
「意大利美食節」舉行日期：今日起至30/05（四）
營業時間：10:30am-10:00pm