鍾麗緹八月將拍攝由英國導演PeterGreenaway執導的新片《TheTulseLuperSuitcase》，與名歌手史汀（Sting）合演情侶。為了進軍荷李活，Christy決定與男友嚴振翔自組經理人公司，實行將前途交由男友全權負責。
近日鍾麗緹（Christy）與男友嚴振翔（John）自組經理人公司，為她進軍荷李活鋪路。據知Christy今次決定將前途交由男友全權負責，乃是其前經理人BennettCheng主動向她提出終止合作所造成。
Christy的事業與她的愛情生活，似乎總有着不可分割的關係，當年她甫入行，便與郭富城因合作拍攝音樂特輯而共墮愛河，後來又與王敏德及陳百祥因工作上的接觸而傳緋聞。九八年在事業發展得如日中天之際，Christy忽然選擇結婚產子。九九年復出後，Christy卻甚少接拍港產片，反而憑瑪花纖體廣告，成為新一代性感女神。現在，她的男友John更直接參與其事業。
而Christy的前經理人Bennett，日前接受電話訪問時說：「係我主動同Christy提出終止合作，我認為我要幫Christy做嘅嘢，都已經做晒，好似拍瑪花廣告、出寫真集同埋拍荷李活電影咁，係時候功成身退。不過，雖然我同Christy唔再合作，但我哋仍然係好朋友。至於講到Christy係咪同男友自組公司，呢方面我真係唔太清楚。」
Christy表示目前最大的心願，是在荷李活佔一席位及推出個人唱片。現時三十一歲、且是一女之母的Christy，今時今日才進軍荷李活，難道不怕起步太遲嗎？
「五年前又未必有𠵱家咁嘅機會，當時就算我想打開國際市場，時間上亦未必啱。反而𠵱家我攞多咗好多人生經驗，基礎又打好咗，會較為適合啲。
「以前我喺香港拍嗰啲角色，全部都係做花瓶，𠵱家香港導演搵我拍嗰啲角色，又係做花瓶。好似叫我拍鬼片咁，又冇劇本畀我，我唔想再做呢啲角色，我想觀眾洗腦，所以我要拍《色戒》同埋《晚孃》呢啲戲。
「生完BB之後，我就開始揀戲嚟拍。好多人以為我冇戲拍，其實係我唔想再做花瓶啫，我要揀一啲好嘅角色嚟發揮。就好似拍過《枕邊禁書》嘅英國導演PeterGreenaway，佢睇完《晚孃》之後，就sende-mail畀我，問我有冇興趣拍佢部新片《TheTulseLuperSuitcase》。我知道個個都想同佢合作，我有咁嘅機會，當然好開心啦。」
既然Christy如此渴望踏足荷李活，會否不設底線，甚麼角色都願意嘗試呢？
「唔可以咁講，好似早排有人搵我拍《變種特攻II》，做一個邪惡女人，我覺得角色唔啱我，所以拒絕咗。唔可以話一有機會，就唔理角色好唔好都照做，有時外國電影裏邊啲中國人，好似定晒形咁，一係眼細細，一係就做埋啲好差嘅角色，好似做雞同做壞人咁！
「就算我拍戲，都唔會露三點，早排PeterGreenaway搵我拍嗰部戲，都想我大膽啲，但我唔想，所以咪同佢講清楚只可以露兩點囉。如果因為咁而得罪咗個導演，咁佢咪搵過第二個囉。」