陳曉東﹙東東﹚喺下年年頭就約滿環球唱片，之前一路傳佢同環球唔妥，環球重雪咗東東一年，搞到東東意興闌珊，其他唱片公司知道東東對環球心淡，即刻斟佢跳槽，坊間重傳其中一間竟然係英皇新開嘅子公司「紅音樂」（MusicIcon）。
「紅音樂」嘅揸fit人黃劍濤（Duncan），以前同東東喺環球共事過，Duncan好賞識東東，想撬佢走一啲都唔出奇，況且東東同舊愛張栢芝𠵱家重喺埋同一間唱片公司，難免會有啲尷尬，走咗就唔使俾人再作話柄啦。不過，如果東東去「紅音樂」嘅話，又會變咗同佢嘅舊情敵謝霆鋒同一屋簷下。
除咗東東，又傳英皇會拉埋由Duncan一手栽培嘅陳文媛（BoBo）由StarEast過檔「紅音樂」，但噚日Duncan喺電話度講：「兩個傳聞都冇可能，亦冇咁嘅打算。」而東東嘅經理人羅嘉慧就不置可否咁話：「𠵱家係有幾間唱片公司傾緊東東，但係邊間就唔方便講。」
寰宇套《當男人變成女人》已經上咗畫，其中有場戲講鄭伊健、王敏德同張達明去買衞生巾，伊健話拍呢場戲唔覺尷尬，因為有工作人員在場。原來伊健細個嘅時候都試過幫媽咪買衞生巾，但當時就唔知係乜嚟嘅，所以都唔識得尷尬。
陳芷菁噚日喺太古城幫亞視主持《你說怎麼辦》，佢話𠵱家忙緊六月中前出兩本書，其中一本會同施念慈合作，問佢會唔會再拍劇，芷菁話：「如果有好劇本嘅話，我都會拍，不過我想專注喺寫作同埋主持方面。」至於同律師男友感情，佢笑住話：「幾好呀！」
鄭中基前晚出現中環蘭桂坊，佢同幾個朋友去附近嘅酒吧消遣。對於其父鄭東漢離開環球唱片，暫時去向未明，點知佢話：「我都唔會有壓力，仍然會做自己鍾意做嘅嘢。我今晚（即前晚）同朋友嚟食嘢，都有飲酒。」佢重話恭喜其前緋聞女友梅小惠同髮型師拍拖。
翁虹前晚到會展欣賞《燃眉之急》首映，佢話早排去內地接受電台訪問，特別請咗四個彪形大漢做保安護駕，但原來佢事前唔知任達華傳聞喺內地俾人綁架。
翁虹話：「好震驚喎，傳咋嘛？做藝人都係要小心啲，我自己就好小心，有人搵我去不知名嘅地方登台，我都唔會去。」
黃德如噚日喺電視城為新節目《中西醫療坊》做開鏡拜神儀式。呢個節目每集都會請中醫師同西醫，講解一個病症，一共十五集，預計喺七月推出。
黃德如已經喺港大讀咗三年幾中醫藥學士課程，重有兩年幾就畢業，佢話今次主持呢個節目，最難係要對中西醫保持中立態度，不過就可以當溫書喎。
張天愛嘅表姨甥JacintaRead喺灣仔開設嘅舞蹈學校前晚開幕，張天愛專誠去捧場，佢話佢冇教過表姨甥跳舞，即使佢自己個女邢嘉倩，都任由佢自由發展，張天愛話佢個女重喺北京讀書。提到名人遭綁架，張天愛話：「唔驚，我個女好少自己出街，而且呢啲嘢香港都唔興，都係唔好提啦。」
林建岳新緋聞女友、靚女公關鄺心怡噚日路過中環。佢以今季大熱嘅民族衫配牛仔褲，手執名牌ChristianDior手袋，手上一枚鑽戒更加閃閃生輝，貴氣十足。鄺心怡一發現記者，即時大叫：「唔好影啦！唔好影！」問到佢同岳少嘅緋聞，佢話：「我唔會答你哋㗎！」