如果要形容上個禮拜個市嘅走勢，伏勝只可以用兩個字，就係認真「谷氣」，皆因班鬼子佬話要調低地產股嘅評級，個市就咁無端端被搞到散晒。喺事發之前，好多投資者原本都以為可以食住地產股賣樓賣個盤滿缽滿，幫手推番個市上去萬二點樓上，點知標準普爾一句話，啲地產股當日就跌到四腳朝天，認真無理由。對散戶嚟講，殺傷力最大嘅係佢哋喺開緊市嗰陣公布，有部份無即時資訊嘅散戶，見到啲地產股跌咗落嚟，以為有平貨執，點知買咗先知係買咗貴貨，搞到一殼眼淚。
伏勝認為，證監班大佬為咗本港散戶投資者嘅利益着想，都應該喺呢件事上面出句聲，話晒佢哋所公布嘅都係一啲對股價有重大影響嘅消息，應該要畀投資者有足夠嘅時間去消化。以伏勝嘅愚見，所有影響到上市公司股價嘅公布，應該規定要喺全日收市後先可以出街，咁樣先可以保障到所有股東的利益。
睇番啲二三線股仔，喺隻光通信（603）復牌之前，似乎都重係無運行，好多隻早前被炒到過籠嘅科技股都跌咗一成幾至兩成，就好似文化傳信（343）咁，就喺早前高位0.47元，跌番落去0.42附近，上個禮拜最低見過0.405元。呢隻股仔一向非常多噱頭，聽講班老細近日喺度放緊聲氣，話又有新搞作，有人話佢哋喺度發展緊一套