財政司司長梁錦松噚日出發去北京，出席「亞太區經濟合作組織金融與發展論壇」開幕活動，阿松凡係去外訪，都唔會放過任何親民機會，一定盡量唔會行VIP通道。噚日佢就同兩個助手，同採訪佢北上嘅記者一齊排隊入閘，但係咁就難免俾記者發現佢唔想人知嘅「秘密」！
話說做保安檢查嗰陣，阿松要拎個手提電話出嚟，無意中俾記者睇到原來係剛剛喺前兩日先搞個大Show，大力宣傳開賣嘅明星手機Nokia8910。阿松手中嘅係限量版純黑色「黑夜星宿」版本，行貨價五千七百蚊，頭一百位買家重有天上明星命名權，廠商重送咗個畀「哥哥」張國榮、李嘉欣等明星！阿松就唔肯講係買定係人哋送嘅。
而記者要佢拎嚟影相，佢亦唔肯，話唔好同人賣廣告。一講起手機廣告，記者立刻諗起早排佢女友伏明霞個手電廣告風波，原來阿松到𠵱家重好㷫，猛話「離晒大譜」，因為個廣告話明喺大陸用，唔可以喺海外登。唔怪得阿松唔幫襯女友代言嗰隻電話喇！阿松重不斷話佢（伏明霞）好嬲，但係相信佢自己識處理喎！
阿松除咗同記者傾偈外，重請埋成班隨行記者一齊飲咖啡，佢老哥真不愧係財政司司長，請七、八位記者飲咖啡，畀兩百蚊佢馬仔去買，唔多唔少剛剛好，證明阿松果然係數口精！
傳真︰2623-9278
電郵︰