九八年一月產下愛女Yasmine的鍾麗緹，同年四月與英籍夫婿GlennRoss在加拿大註冊結婚，可惜這段婚姻僅維持了大半年便破裂。對於當年所行的路，Christy無怨無尤。
「我覺得呢個世界唔應該為任何事後悔，每一段經歷都係一個經驗，如果畀我行多一次，我都會再咁行，我寧願做咗，好過將來後悔自己冇做過。有人覺得我生BB會錯失咗好多機會，但我反而覺得呢件事畀到我好多人生經驗。冇錯，我如果冇生個女嘅話，可能𠵱家已經做咗『最佳女主角』，但有啲嘢人生可能只係得一次，我睇嘅嘢比較長遠啲。
「其實我𠵱家都有好多機會，生完女之後，機會反而重多咗，𠵱家我返到屋企，雖然好攰、好辛苦，但見到個女咁得意，就乜都會忘記晒。個女畀到好多啟發我，畀到一種原動力我去做嘢，𠵱家嘅我就好似SuperWoman咁，做乜都得。我有啲女性朋友其實好羡慕我可以生BB，佢哋話自己都好想生，不過怕生完之後會跌落嚟（指事業發展）。」
言下之意，Christy從愛女身上得着的，似乎遠比失去的多。
「係呀，以前我冇乜目標，成日好緊張，好唔開心，但生完BB做咗媽咪之後，真係改變咗好多，睇嘢比以前清楚，做嘢嘅信心亦大咗。我入咗行差不多十年，以前好介意人哋點樣睇我，但𠵱家……總之自己開心，又唔係害人嘅話，咪去做囉。」