一位應屆高考生小黃來電郵，講佢本想以中大日本研究系為首選，但睇完左丁山前一輪講過，酒店管理系畢業生喺未來幾年較為容易搵工，於是佢又心郁郁。
小黃，老實講，如果你真正鍾意讀日文嘅，唔使三心兩意啫，若論職業前途，酒店管理自然較「日本研究」實用，不過讀書講興趣，先至會讀得過癮，要強迫自己讀酒店管理而又唔鍾意學點樣去鋪床單、刨薯仔、做侍應，咁就無謂啦。如果你真有興趣嘅話，主修日本研究，副修酒店，或者兩主修副修對調，咁都幾好，管理酒店而識得中英日三國語言，一定佔優勢，搵酒店職位都快啲。
收到小黃電郵之日，咁啱就同「準部長」共吃午飯。飛機C年年interview唔少畢業生，對「非商科生」特別睇重。坦白講，人事部見過百零個人，先至會揀十個八個畀佢做最後一輪挑選，所以佢見親嘅都係「揀手貨」，電腦黃個女喺英國讀緊碩士，最近都自費飛番嚟三次去見佢間公司。「準部長」話：「我嘅個人偏見係啲文理科生嘅視野、思想會廣闊一啲，不拘一格，更有創意，大學時代讀商管學士，腦袋一早被管理教科書理論定咗型，入到嚟我哋公司，未必係良好資產。」
「準部長」讀政治學出身，頭腦非常靈活，又多計仔，搞到間公司形像toptop掂，抵佢有「偏見」，左丁山問佢係唔係做部長，佢一於唔承認，拜拜之時，恭喜佢唔會做部長，佢竟然話：「我又冇話No噃。」