澳門體育總局好重視噚晚中葡大戰，所有球迷入場都要經過金屬探測器先可以入場，球迷入場已經覺得唔係幾方便；點知賽事落起攔門雨，球迷好自然帶把遮入場，但大會講到明唔可以，搞到部份球迷要走返落去放低喺賽會預先安排好嘅儲物室，想偷雞都唔得。
中葡大戰對港澳體壇嚟講都算係一大盛事，所以除咗我哋董特首專程過澳門睇波，港協會長霍震霆、足總主席康寶駒同董事之一洪祖杭都有到場，而賭王何鴻燊當然係座上客，主席台認真重量級。
由於澳門將會喺○五年舉辦東亞運動會，故此有關方面亦趁機會喺呢場中、葡之戰中宣傳；喺半場休息時，除咗播放東亞運會歌之外，還特別向現場觀眾介紹賽事嘅吉祥物柏柏。
賽前話有傷可能唔會上陣嘅世界足球先生費高，下半場喺後備席起身熱身時，球迷已經起哄，當最後十五分鐘佢後備入替雷哥斯達嘅時候，全場簡直陷入瘋狂狀態！梗係啦，大家期待已久，佢老人家冇態都畀面上陣噃；加上場波算係幾精采，入場嘅球迷或者電視觀眾，應該收貨啦。
葡萄牙中場雷哥斯達被選為最佳球員，獲得一萬美元獎金（約七萬七千港元）；而各建一功嘅葡萄牙前鋒包列達及紐奴高美斯，則瓜分神射手獎金一萬美元。不過，佢哋表示會將獎金捐作慈善用途。