港股上周死守11600點，個勢睇落唔多妥，恐怕要填補5月2日11497至11577之裂口。本周四期指結算，5月有成5萬幾張期指未平倉，市場傳聞有兩個倉過萬張，看來港股將有一場大風浪。
要挫低大市，滙豐（005）和中移動（941）是必插之股。中移動近期落後大市，加上剛剛有新資產注入，向下做水位唔多。反而滙豐有可能回落至30日線（93.4元）和50日線（92.2元）。
滙豐Put輪中，筆者比較喜歡價外輪，9163及9006符合刀仔鋸大樹的精神，正股郁一格，佢哋行三四格。從引伸波幅來看，12月80元認沽期權24.5%，9月的是25.1%；正股歷史波幅3個月為17.3%，6個月為19.32%。歷史波幅低過引伸波幅，可能是反映市場認為大笨象股價將會有較大波動。以上周五收市價計算，9163的引伸波幅成31%，9006就25.9%。認沽價外輪的引伸波幅通常較高一點，因為怕股災。筆者建議短炒Put輪一星期，到周五個市都唔跌就走人。
鍾斯