廣東食法：炸
蝦肉雲吞是港人較為接受的一款雲吞，食法有放湯或炸，最簡單快捷是以清雞湯烚熟就食得。為了更香口，後來有人以炸方式烹調，將之炸至金黃香脆，再蘸以酸甜醬食。
餡料：
鮮蝦肉4両
豬肉2両
芫荽碎少許
皮料：
麵粉8両
高筋粉4両
水8両
調味料：
鹽、糖、生抽各少許
製法：
1.雲吞皮：混合高筋粉與麵粉，逐少加入水拌勻成麵糰，搓至不黏手，以木棍輾成薄片，最後加熱略烘乾，𠝹出正方形。餡料：豬肉剁碎後加入調味料拌勻，加入1隻雞蛋撈勻，以順方向攪至起膠，再加入切粒的鮮蝦肉及芫荽碎拌勻。
2.雲吞皮放上餡料，對摺及掐實邊皮，左右兩邊搽少許水，兩邊兩角對摺成元寶形。燒滾油，放入雲吞，以慢火炸至金黃香脆便可。
醒目小貼士：
1.菜肉雲吞，主要用大白菜或津菜，大白菜會較爽口，菜肉份量通常是2:1就最恰當，而菜必須預先拖水，然後切碎及揸乾水後至拌入豬肉碎內。
2.黃宏發自製嘅家鄉上海菜肉雲吞因為餡料用咗白菜，所以即使雲吞烚耐咗啲餡都重係實及爽。
3.雲吞皮麵粉及高筋粉比例為2:1，高筋粉作用是令皮更韌身，烚時不易爛。
4.用現成春卷取替自製雲吞皮亦可以，較方便。
5.未用之雲吞皮最好用濕布蓋住，免被吹乾而變得硬難於包。
其他食法：
煎：呢種食法較少見，外省人居多。以小量油將雲吞煎至表皮香脆，而餡則仍保存原汁原味。
紅油：即以辣油加麻油及其他醬油製成嘅一碗紅油，色澤雖然紅噹噹，但只是帶微辣。紅油抄手是台灣人其中一種食法。
雲吞的起源可追溯至西漢，當時稱之為「餛飩」，及後傳至明朝，又有另一叫法「扁食」。流傳至今，雲吞幾乎遍及中國各省，只是名稱不一致，台灣至今仍叫雲吞為「扁食」，北京則叫「餛飩」，四川叫「抄手」，而我們叫慣的「雲吞」其實就是京式餛飩演變而來。
宋代時，雲吞被視為節日食品，冬至、春節家家戶戶都有食雲吞的習俗。
各省對雲吞有不同叫法，但雲吞內之餡料其實大同小異，離不開蝦、豬肉、菜等，傳統廣東雲吞是豬肉為餡料，後來有人加上蝦肉，令其更爽口彈牙；上海雲吞主要餡料是青菜及豬肉，亦有用大白菜同牛肉，但並不普遍。
至於雲吞形狀及大小，各地亦有分別，最為人熟悉的有元寶形廣東雲吞，大小適中，剛好一口一隻。另浙江省有較為大隻的溫州雲吞，因為Size較大，至今呢種食法已並不普遍。
大地魚熬湯
湯底是雲吞的精髓所在，一碗雲吞無論包得多好，抑或餡料多好味，無甜美的湯底襯托之下，這碗雲吞始終係較遜色。坊間的雲吞湯底，用料主要有大地魚、豬骨，亦有加入蟹籽、蝦籽、蝦殼、蝦頭、陳皮、蝦米、羅漢果或薑等等熬製而成，使成為一碗濃郁而又美味湯底，配以雲吞食就更錦上添花。
如果嫌自製湯底麻煩，其實都可以到超市買現成清雞湯做湯底，味道都不俗，既簡單又方便。