星期二本欄寫《平民實況》，講失業中年漢喺快餐店食其他人嘅「早餐剩餘」。發行界強人萬事德睇完打電話嚟投訴，話左丁山以偏概全，要弄清楚一啲事實。何解呢？萬事德話：「其實好多香港人食慣歎慣，已經唔肯捱苦，有工都唔肯做。我哋請司機兼運貨工人，過萬銀一個月，香港人做三日就走咗。現在我哋啲區頭，多數係新移民，講福建話嘅多，甚至深圳大學生都唔掂，請咗一位深大畢業生，唔使佢送貨，只係要佢睇住啲分區帳單，管理啲送貨員，做咗一個月就嫌辛苦，走埋。你估真係唔使做咩，現在我哋唔夠工人㗎，有百分之五嘅空缺，請極都請唔到人，皆因流失率高之故。惟有叫工人多開OT，開得多佢哋話好辛苦，一於鬆人，咁就形成一個惡性循環。」
萬事德嘅說話當然係一手資料，夠晒權威，冇得同佢拗；事實上，自九七年開始，佢已經請唔夠夥計，但嗰陣時經濟好景，𠵱家香港已經衰咗五年，估唔到仍然係有工冇人做，有人冇工做。睇番啲政府統計數字，失業率創新高，企住百分之七點一，估計暑假期間，大中學畢業生湧入勞工市場，失業率會繼續爬升，但亦可預料到，萬事德唔會請到足夠工人！萬事德因而大發牢騷：「香港有排衰！」希望唔好啦，大家齊齊努力，重復香港威風。