董建華今日帶埋一家大細去濠江睇中葡大戰，梁愛詩就要捱義氣做一日署理特首。其實今次並非詩姐姐第一次做署理特首，話說九九年建國五十周年大典，阿董帶埋陳方安生、曾蔭權上京，一向愛國嘅詩姐姐雖然首次有機會做署理特首，但冇得上天安門城樓，不知幾失落。
今次詩姐又無端端有機會做阿頭，皆因為煲呔曾去咗歐洲訪問未返，阿松今日又起程去北京，順理成章由詩姐擔起重任。不過阿松今次唔係專程去會女友，而係參加APEC「金融與發展論壇」開幕禮，二十六號重會特登坐四個鐘火車去濟南市，參加二十七號舉行嘅「山東香港周」開幕儀式。咁巧同時伏明霞亦會以體育形象大使身份，出席北京一個世界體育論壇。
噚日霞妹重話，知道阿松要來北京，至於有冇時間拍吓拖？佢笑住話要睇抽唔抽到時間。八方重八到，六月三號阿松首次官式訪問美國一個星期，霞妹到時又抽唔抽到時間過去花旗一聚呢？
講番阿董，今次認真過癮，佢同董太及一班孫坐直升機去澳門睇「中葡大戰」。美中不足係時機似乎唔多好，因為香港啱啱先通過禁止境外賭博的條例草案，將澳門列為「境外」，一舉得罪晒澳門嘅馬會、狗會、波會同所有澳門人，賭王更指摘「香港大蝦細」。唔知阿董見到鏵哥、燊哥，會唔會講完數先有波睇？又會唔會被人掟葡撻呢？
傳真︰2623-9278
電郵︰