雖然呢排二三線股仔重係好活躍，但唔知係咪炒股龍頭光通信（603）停牌，小初總係覺得好多股仔升幅雖然大，但成交量始終唔多夠，兼且升一日就回一日，冇咩氣勢，唔似光通信幕後咁大氣魄。真係好想光通信快啲復牌，無論升跌都好，等小初唔使成日同啲孤寒莊家周旋。
唔識中文但熱愛炒股仔嘅ABC，呢排雖然繼續受經紀仔亂點，但久唔久都搵到食。不過，ABC個經紀仔有時散播嘅料，就真係嚇死人，好似佢話惠揚控股（231）近期成交量大增，股價又有異動，一來係因為公司就嚟改名做環球動力，同以前個老闆劃清界線，二來賭王四奶又申報揸咗唔少，所以隻股已經唔同晒。
經紀陳聽完之後，就話一定唔關四奶事，自從多個月前，惠揚股價勁插之後，有班炒家坐落唔少貨，但佢哋同四奶並無關連，主要因為近排股仔炒風旺盛，佢地不甘寂寞出嚟玩吓，如果亂上車好易中招。 慕容小初