記得五年前揹背囊去歐洲玩，第一站就係去希臘，記得接近40℃高溫下唔可以喺中午時分外出，要匿喺白色小屋內同好友玩大富翁，記得黃昏才出動，喺日落時分上山睇日落，拍低白色小屋哪一剎那，就覺得花上二十幾年嘅儲備都係值得嘅……今日，似乎唔使再坐十幾個鐘頭機，花嘅盤川亦毋須要太多，就可以近近哋喺菲律賓搵到個小希臘──波塞羅拉PuertoGalera（PG）。
記者：朱維達
起初我都係同你一樣覺得，波塞羅拉PuertoGalera（PG）？咩地方嚟㗎？介紹啲咁鬼偏遠嘅地方，有無人去㗎？睇番資料先發覺，唉！我實在太無知啦！波塞羅拉離香港一啲都唔遠，搭2個鐘頭機到馬尼拉之後，喺機場坐2個鐘頭車，途經Taal湖及死火山區到BantangasCity後（上次13人去有4架旅遊小巴接送），再搭45分鐘接駁船就到。
其實PG早已響七十年代成為潛水人士嘅夢樂園，但期間因過度開發而令生態環境大受損害，及後當地政府積極改善環境，發展旅遊業，當地人亦由捕魚業漸漸轉營導遊、水上接送等旅遊副業，使過度捕捉、炸魚問題得以逐漸解決，生態環境已逐漸回復昔日風采。
講番戲肉──AtlantisDiveResort，係一間位處樹林內嘅酒店，除咗附近瑞士平房式建築，最正嘅就係其中嘅HoneymoonSuite，外面以「變形」希臘式的白色小屋做設計，打破四方平面風格，周圍外牆以至內部裝修，都以不規則造型設計，每個地方都好似一件藝術品一樣。
房間內部同以白色為主調，我覺得最正嘅地方就係房間中嘅牆壁設計，牆內裝上多支暗燈，配合白色牆身反射，加上深棕色嘅木製家具，感覺就好似住在一間大豪客房間一樣，真意想唔到一個毫不起眼嘅旅遊地方，竟有如斯酒店質素，不過，話明HoneymoonSuite，最好同你嘅愛人一齊住，因為鑑於崇尚大自然風格，如廁時係無門遮擋嘅！
AtlantisDiveResort
地址（郵寄用）：AtlantisDiveResort,c/oDreamTime,NorthSyQuiaBldg.#23,1991M.H.DelPilarSt.,1004Malate,Manila,Philippines
電話：（63）43-2814066（由於地方較偏遠，若果想與酒店接洽，最好用電郵或與負責人以手提電話聯絡）
電郵：
手提電話：（63）973-497503
網址：
去到PG又點會係住幾晚跟住番香港？除咗附近多不勝數嘅餐廳同酒店畀你歇歇，咪浪費由大自然設立嘅潛水天堂，愛潛水甚至對潛水一竅不通嘅朋友到PG簡直係天造地設，因為近兩年風季延遲至9-11月，夏天都係當地嘅潛水季節，而且其地理環境亦有提供適合初學以至對潛水有經驗人士盡情地探索。
唔好以為啲潛水設施會較殘舊，當地嘅DivingCenter由德國人開設，而且潛水器材全是名牌子Mares兼新簇簇，認真正斗！今次Package會包埋4次潛水，乘搭Banca穿梭於各潛水熱點，其中離Sabang對出海面約3分鐘船程，有兩艘沉船位，你會在此發現大量魚群聚集，其他潛水熱點包括Cathedral、LayagLayag、Dive7000Resort對出水底、TwinRocks及Mainit等，最好係選擇午後及太陽下山前落水，因為可以有機會睇到珊瑚覓食「開花」嘅奇景。
旅行始終都係買個Package抵玩啲，尤其係較鮮為人知（但由超級正斗）嘅旅遊地方，最重要係交通上唔使自己操心，除咗機票同交通，其餘行程仍然係自己話事。推介以下Package，入住嘅房間類型非HoneymoonSuite，但亦係DeluxeRoom，若果要一試前者，每人亦只係畀多200蚊（若果自己Walk-in加10%），加上當地消費實在不算貴，今個假期你真係使約五千蚊就可以去個小希臘之旅兼玩埋潛水，重想點吖！
PuertoGalera4日3夜潛水Package
費用：$4,780（有效期至6月30日）
費用包括：來回馬尼拉機票、機場至酒店交通安排、膳食、4次提供BoatTrip、DiveGuide、氣樽、鉛帶潛水。
查詢：29261668（SunnSeaHolidays）
網址：
出門提一提
簽證：持BNO、特區護照者遊菲律賓免簽證，CI持有者則須辦理。查詢：28238500（菲律賓領事館）
氣溫：26℃-33℃