前晚抵達澳門的中國原先計劃只會晚練，但前晚中國班教練團研究後，決定今日加插一課輕鬆晨操；而前晚喺香港睇完回歸盃的教練米路亦有出現，操練前重同郝海東傾咗幾句，之後兩個都笑笑口，唔通米路話畀郝董聽，聽日對葡萄牙會正選上陣。
中國隊噚日喺澳門舉行記者會，米路自然成焦點，佢被不同國家嘅記者全程咬住唔放；反而陪同佢出席記者會嘅隊長馬明宇同范志毅就被冷落，范大將軍只係答咗一條問題，馬明宇就更加得個「坐」字。
葡萄牙喺澳門咁多日，無論晨操或者晚練都唔多過七十分鐘，但噚晚佢哋竟然操到成七點半至走人，其中費高、包列達同干斯卡奧等重猛練射球，估唔到今屆出爐法國足球先生包列達原來係射罰球高手，唔知決賽周佢有冇機會表演妙技呢？