港股近期走勢雖然唔跟貼美股，有時甚至背道而馳，但周三及周四美股連升2日，始終有助港股企穩，恒指噚日微升2點，收11626。
一周埋單計數，恒指下跌347點，跌幅2.9%。恒指周線圖出現一支大陰燭，而上周低位（11587）及高位（12007）均低於前周，打破一連5周一浪高於一浪嘅走勢，發出轉勢訊號。
恒指短線技術走勢轉淡已經係不爭嘅事實，相信唔少技術派短線炒家已部署造淡，形勢確不利後市，但下周四期指結算，未平倉合約仍接近5萬張，好淡決戰將進入白熱化，目前形勢雖然對淡友有利，甚至有人開始唱恒指要見萬一點，但一周之前，何嘗不是大部份人睇好恒指升破萬二關，重展牛市升浪。
趙飛雲信技術走勢多過信消息，但目前對港股後市唔太悲觀，主要係相信好友唔會輕易將到口嘅「肥肉」放棄，因此周四逆勢小注買入恒指CaII輪9045，博好友下周展開反攻，當然買入之後亦預咗要硬接淡友一腳，恒指跌穿11497就要跳車止蝕。趙飛雲唔鼓勵讀者逆勢造好，但現時好淡勝負未分，造淡嘅風險其實一樣大，睇唔清楚寧願高掛免戰牌好過。 趙飛雲