關錦鵬同鄭伊健一齊幫香港電台執導嘅「無煙草系列」之《煙絲萬縷》音樂電影，下星期二就會舉行首映禮，有份演出嘅張學友，本來認為部戲係講禁煙，所以初時唔想揸住支煙拍戲，但因為劇情需要，學友最後都順應導演要求。事實上，學友已經冇食煙好耐，要佢揸住支煙，又真係幾難頂嘅！
而馮仁昭噚日同伊健食晏，佢話今次雖然係義務性質做導演，但對佢嚟講就獲益良多，好似佢一直好欣賞嘅關錦鵬，除咗讚佢有導演潛質之外，重話嚟緊八月開新戲嘅時候，會預埋伊健一份，搞到伊健不知幾咁開心。而《煙》片裏面有唔少男性赤膊鏡頭㖭，而且麥兜仔李晉緯重要全裸演出！
在無綫劇集《皆大歡喜》中飾演太監嘅演員黎銘諾，噚日喺電視城餐廳內食午飯嘅時候，突然肚痛，面青口唇白，要躺卧在櫈上休息，其他演員大為緊張。
而原本喺化妝間內休息嘅薛家燕，都即刻出嚟睇吓佢，並十分擔心，最後黎銘諾被送咗去醫院治理。
梁家輝噚日朝早同女助手出現香港國際機場嘅抵港大堂，佢哋啱啱喺法國出席完康城影展返嚟，只見家輝噚日落機之後好似好攰咁，除咗戴住頂白色cap帽同黑超，同埋着住件運動外套，佢重一早就飲住罐可樂提神，認真歎。
汪明荃同香港話劇團合作演出嘅話劇《如夢之夢》一連十二場，喺星期三（二十二日）圓滿結束，並獲得觀眾一致好評，當晚公演完畢後，成班演員立即搞慶功宴慶祝一番。阿姐當晚心情大靚，重喺席上大談對話劇團嘅一份深厚感情，同大家分享內心感受。
肥媽瑪利亞前晚去咗灣仔京都戲院，出席新片《一屋貪錢人》嘅首映。佢話自己自從切除咗大腸腫瘤之後，𠵱家日日進補，體重增加咗九磅。佢話：「我𠵱家搵陳伯幫我睇病，佢畀我啲藥食完會屙，屙出嚟嘅嘢，臭到唔單止個廁所我唔敢畀人入，連間房都唔敢畀人入吖！」
黃伊汶（Dior）、王喜、溫碧霞同譚俊彥日前去澳門登台，穿上露腰兼露背上衣嘅Dior同王喜最受現場觀眾歡迎，歌迷一見佢哋，除咗不停追車外，重瘋狂拍打佢哋架車，十分危險。Dior話：「我好少出席呢啲活動，而且重係公開演唱，對於現場觀眾反應咁好，我真係估唔到。」