港股牛牛皮皮又一天，恒指收11627，升2點，成交縮至75.3億元，大戶似乎保留實力留待下周期指結算時決一生死。
中國太陽神（512）宣布與中科院成立合營公司後，周四復牌，市場初時對消息冇咩反應，但噚日至覺得呢單嘢有料到，刺激股價急升30%，收0.39元。
ｉ師傅話，太陽神可能重有大動作嚟緊，絕對不容忽視。今年市場焦點係生化科技，長江生命科技上市，炒家準備狂炒生化科技股，而今次太陽神泊到中科院呢個大碼頭，可以話係食正生化科技熱潮，加上太陽神屬細價股，啱晒炒家同中資胃口。
恒隆地產（101）噚日成交顯著增多，達1.17億元，但沽空同時亦多達8590萬元，沽空佔成交額達73%。沽空咁大，股價自然偏軟，全日跌3.3%，收8.70元。
恒隆地產發行12億元可換股債券只係平常事，不過弊在行使價係9元，與周四收市價一樣，自然引來對沖基金垂涎，一方面認購可換股債券，一方面沽空正股。據行內人士話，恒隆地產短期受對沖活動影響，可能會下試7.50元至8元水平，短期不宜沾手。
四通電子（409）宣布由段永基坐正主席位後，據聞有好多發展大計將進行，特別係董事會傾咗好耐嘅業務重組計劃，以及引入國際性投資者等，所以段氏一上位，股價噚日即大升7.14%。黑客話，就算段氏坐正，要進行重組都唔係咁簡單，相信重要等多一段時間先掂，奉勸投資者咪心急。 阿虎