和黃將紅磡黃埔花園第8期黃埔新天地改為蔡瀾美食坊後，引入多國食肆，令到個場知名度大增。最近又趁世界盃熱潮，響一樓中庭安裝一個100方呎特大投射大銀幕，於本月31日至6月30日期間，現場直播各場世界盃比賽，相信淨係啲波迷，都可以迫爆個場。
深圳福田星河華居早前開賣，一個禮拜賣咗200幾個單位，半個月售出逾40%單位，聽講話啲單位有個超大轉角凸窗，可盡覽米埔灣全景，令買家大為受落；而發展商重引述深圳中原租務部資料，指樓盤嘅租金回報達到8厘，個盤位近皇崗口岸，應該較易搵到租客。
新世界屬下富城物業，最近設咗個全港首創嘅「電子投票」系統，每個業主都會擁有一個「barcode」（即條碼），到業主大會選舉時，到場業主用個barcode嚟辨別身份同投票，可以減省點票時間，重可以慳番三分二人手。聽講富城響現有電腦系統寫多個程式，就創咗呢個「電子投票」系統，唔需要額外使錢。另外，富城屬下嘅沙田第一城同荃灣海濱花園，響環保署搞嘅「屋邨三環奪保新紀元」活動中，攞咗6個大獎。
蘭西