章小蕙被最新一期《忽然1周》指她為還債而捨陳曜而去，搭上寶馬車行高層，她昨日否認其事，表示該人只是汽車經紀，她當日只是試車。但負債二億五的章小蕙竟想買七十多萬的寶馬四驅車。
章小蕙日前將其男友陳曜旻身份降級，聲稱二人只是好朋友。自此章小蕙緋聞不絕，繼早前被拍得與一男伴蒲吧後，最新一期《忽然1周》報道，指章小蕙為了二億五千萬元的債務，不惜離陳曜旻而去，搭上寶馬車行高層「大Sir」。
昨日章小蕙在其中環時裝店否認此事，她謂該名大Sir只是汽車經紀，當日二人只是相約試車，而負債纍纍的章小蕙亦不諱言欲購買價值七十多萬的寶馬X5四驅車。
章小蕙昨日說：「嗰個唔係高層，只係賣車經紀，我當日叫司機車我去佢哋馬頭圍道間陳列室睇車，佢哋問我去邊度試車，我話去銅鑼灣，咁我叫司機車我去銅鑼灣試車，我就泊架車喺佢架車後面囉，之後就去買CD。」
章小蕙續說：「我去到銅鑼灣都發現有記者影相，我唔識呢個經紀，只係第一次見面試車咋。寶馬高層幫得到我咩？作料都用吓腦啦，我𠵱家搵男友只求開心，等我容光煥發，我不嬲都經濟獨立，就算同陳哥哥（指陳曜旻）拍拖都係。十日內整兩個男人畀我，敬請各位男士冇必要唔好行埋嚟，費事影響人哋，而且我冇諗過交男朋友。」
陳曜旻看過此報道後有何反應？章小蕙說：「唔好叉開第二啲嘢講，我𠵱家架舊車，都賣到幾萬蚊，用嚟畀新車首期，然後每個月供幾千蚊，我公司負擔得起。」
至於欠裕泰興的二億五債項，章小蕙說：「佢哋叫我每個月還六十萬，我已交畀律師處理，我今次係公司換車，佢係告我私人，公司同私人冇關。」問到債務官司是否下月上庭？章小蕙說：「成件事控制權唔喺我度，我只會努力工作。」
寶馬X5是寶馬車廠生產的唯一一款越野四驅車，售價七十多萬元。這款四驅車於九九年推出市場，全球售出超過四萬五千架。
X5擁有強勁性能，最大馬力輸出為二百八十六匹，車廂更集先進科技於一身，內置記憶座椅及車廂電話等。不少藝人如古天樂、呂方及張智霖等都擁有此車。
採訪、攝影：馮美茵