灣仔的紅燈區最近多了點「黃」氣！樓高兩層的咖喱店在灣仔駱克道開其第三間分店，除了繼續賣大熱咖喱食品及招牌烤羊髀外，更加添了自家創製的咖喱美食，以前未用過的材料如豆腐、水果、罌粟籽，配合各種咖喱，變出多款適合本地口味的菜式，炮製出咖喱新傑作。
記者：莫麗嫦
攝影：伍慶泉
咖喱與羊肉實為最佳搭檔，香濃的咖喱汁可辟去羊肉的羶味，令羊肉香而不羶。加入了大量肉桂的咖喱，色深而被稱為黑咖喱，加入了連皮的芒果，令芒果煮時亦可保持形狀而不溶於咖喱內，卻充滿芒果的香甜味。
試味報告：第一次試到芒果配咖喱的味道，清甜中見香口，味道容易令人接受。
唔好被水果甜美嘅外表騙倒，用水果做咖喱不一定是甜，估不到比一般咖喱還辣。以蘋果、香蕉及菠蘿加入中辣的黃咖喱內同煮，其酸味有助加強辣度，令咖喱變得更香更辣。
試味報告：辛辣的黃咖喱有助帶出果味，極之醒胃。
原隻牛膝有成3磅重，可以足夠2-4人分享。牛膝事前不經醃製，先用大量香料將牛膝燴1個小時，讓牛膝完全入味方才罷休。到上枱前半個小時，師傅會再用濃咖喱將牛膝多燴半個小時，工序繁多，因此必須預訂。
試味報告：牛膝雖然肉厚，但由內至外都非常入味，肉質亦軟腍，骨髓部份更是最美味之處。
素食者雖然在咖喱菜式上選擇較少，但亦未必一定次次咖喱蔬菜咁單調。餐中創新的炸咖喱豆腐專為素食者而設，每件豆腐都蘸上香料粉漿才炸，因此香濃度不遜於肉類，是極受本地食客歡迎的菜式。
試味報告：火紅色的咖喱其實是受番茄顏色影響，入口並不辣，是個溫和的菜式。
嫌淨係咖喱唔夠激，加埋罌粟又點睇？當然唔係要你吸毒，只係將三文魚扒蘸上加有罌粟籽及其他香料的粉漿，落鑊炸香至金黃色，炸脆後十分香口兼有咬落卜卜脆的罌粟籽，配少辣的咖喱汁已經夠晒惹味。
試味報告：炸後的罌粟籽十分香脆，比芝麻更香口，與三文魚的鮮味相配合。
唔食得辣嘅朋友可嘗試用飲品解辣，餐廳有乳酸及薄荷茶供應。乳酸除原味外，還有芒果、士多啤梨及香蕉味，全用鮮果打製再溝入乳酪；薄荷茶則用新鮮薄荷用猛火煲，將薄荷味迫出，可作冷熱飲品，同樣可紓緩辛辣感覺。
出爐後的羊髀保持豐富肉汁，而且殘留於錫紙內的汁料會用器皿盛着，與主角一同上枱，原汁原味呈現客人面前。顧客可以揀要半隻或原隻，半隻羊髀亦有兩磅重，原隻四磅要幾個人先食得晒，不過亦需要預訂。
試味報告：羊髀辛辣香口，肉汁豐富，隨時食到你熱汗直流，用來佐酒就最好不過。
烤羊髀自舊店已有，一直非常受歡迎，今次第三間分店開張依然成為鎮店菜式，究竟有乜嘢獨門秘訣可以令呢隻羊髀俘虜人心？
店名：恆河咖喱屋
電話：28663268
地址：灣仔駱克道126-128號地下、1樓及2樓
營業時間：
上午11時至下午3時，晚上6時至11時。
座位：約120個
付款方法：現金或信用卡（Visa,Master）