電訊股消息不利，地產股沽壓又重，大市在前日略為喘定後，噚日又落過，恒指收市11624，跌170點，10日線（11758）同20日線（11675）都應聲而破，走勢又再轉劣，但若能守穩在11450之上，中期升勢仍未被破壞，下周期指結算前，料會有較大波動。
大市唔對路，炒家雞飛狗走，早排恒指衝萬二關時看好之輩，又轉為睇淡，短短兩日，態度180度轉變，家吓投機者一見勢色唔對就走頭，冇人會上身。前兩日升得好哋哋嘅和記港陸（715），噚日就走晒樣，好友原本已有計劃策動新一輪攻勢，但見沽盤有如洪水淹至，亦惟有收手，暫避其鋒。
藍籌下跌，二三線股唞氣，部份資金向國企埋手，基金睇好嘅石化股又有好表現，上海石化（338）高收1.21元，升5仙，儀征化纖（1033）亦有4仙進帳，若揀中線對象，呢兩隻都可考慮。至於電力股，本欄曾推介的華能國電（902），已升上6.5元水平，反而山東國電（1071）則因早輪美資股東沽貨而下跌，現雖回上2.0元，但相對華能，明顯大落後，現價低吸，持作中線，賺取兩三成利潤應不難。
山東國電去年獲利13.79億元人民幣，增3%，今年首季總發電量比前同期增7.92%，加上利息開支減少，估計今年盈利會有5%增長，每股盈利約26港仙，以相對同類股較為保守的10倍PE計，年底股價可見2.6元。
宏安集團（1222）與康健國際（8138）重組業務，以2.2億元將位元堂注入得利集團（897），PE12.24倍，賣家則收取得利發行的新股和可換股票據。
康健在出售位元堂股權後，將會集中發展中港兩地的醫療網絡和藥品業務，加上太太集團（太太口服液生產商）董事長朱保國最近又入了股（聽聞重會增持），以朱保國在內地的人脈關係，對康健拓展內地市場大有幫助。噚日康健股價硬朗，收0.22元，大跌市中屹立不倒，已有留意價值。
郭兆誠