陳文媛（BoBo）、陳司翰、李蘢怡、肥媽瑪利亞同陳啟泰，昨日出席喺港台舉行嘅「粵港澳耆英饑饉8小時」記者會。
佢哋昨日重即時量度身高同體重，計算是否適合參加饑饉，在場只有肥媽冇量度，主持人就取笑肥媽話：「個磅冇肥媽嘅磅數。」即引來全場大笑。而BoBo就不符合資格，低過標準十磅有多，BoBo話：「可能我呢排多嘢做，所以咪瘦咗囉。」
肥媽就話自己雖然因病卧床兩個幾月，但反而肥咗九磅，佢話：「其實我重有個子宮瘤要割，但醫生話遲少少先可以割，加上我中西合璧，睇緊陳伯，佢就叫我最好唔好割喎，不過我就覺得遲早都要割㗎啦，所以都係割咗好啲。」
採訪：胡比 攝影：仇志德
前日天氣雖然唔多好，不停咁落雨，但仍然無阻一大班佳麗去清水灣電視城進行港姐面試嘅決心，不過呢班佳麗嘅質素就普普通通，有啲重一見鏡頭就左閃右避，表現唔多大方。其中一位長髮佳麗就好惹笑，佢面試完行出嚟撞見成班記者，即刻將一把長髮撥向前面，再喺手袋入面拎埋頂帽嚟戴，搞到自己好似貞子咁樣。
馮仁昭覺得班女仔既然參加得港姐，就應該預咗要去面對群眾，如果連影相都要驚，試問佢哋又點企上台鬥靚呢？
鍾麗淇、陳霽平同江芷妮幾位靚女，噚日喺香格里拉酒店為明珠台做宣傳，一眾美女不約而同着性感裝束，其中鍾麗淇就最搶鏡，着咗件lowcut衫，而江芷妮都唔輸蝕，同樣以性感小背心亮相，佢哋重喺記者會上大踢小型足球，搞到手忙腳亂，十分失儀。
有雜誌寫話黃貫中不滿環球唱片高層陳少寶唔幫佢出嘅碟做宣傳，重係咁數同公司嘅張燊悅同黃伊汶。噚日黃貫中喺環球高層嘅陪同下見記者，佢話呢段報道對佢好唔公平，佢從來冇喺訪問度提過任何人嘅名，對於影響到張燊悅同黃伊汶，佢覺得非常之唔好意思。
今期《壹週刊》寫咗段新聞關於向華強嘅姪仔向展偉話自己嘅科網公司WebVideo資產值三億，更擁有向家龐大影音視像產品，向華強為免外人誤會，特別同馮仁昭澄清話所有中國星嘅影音產品都授權咗畀Yahoo，而且合約去到○三年，冇同任何其他公司有口頭協議。
張學友最近除咗忙做巡迴演唱會外，重忙於籌備舞台劇《雪狼湖》國語版，其實學友一直都想將《雪》改編成國語版演出，𠵱家頭痛去邊度搵女主角，但如果用內地演員，又怕去唔到台灣演出。另外佢亦要為歌曲傷神，舞台劇中嘅四十二首歌全部改編成國語後，學友就要重新記歌詞。