港股本來可以守住11700，點知印巴鬧出可能爆發戰爭，加上國際大型電訊股下跌，淡友借勢發難，恒指11700失守，以11625收市，跌170點，成交金額95億元。
阿虎暫時都唔知下個禮拜好友會出邊招數，將期指結算價推高。
天鷹電腦（1129）噚日一度勁升逾７%，但其後沽盤湧現，升幅收窄至３%，收0.69元。
天鷹成交大增至1417萬元，似乎有人正在出貨獲利，不過公司配股目標未達到，相信有心人士唔會咁快洩氣，加上現時流行炒工業貿易股，以及聯想（992）業績理想，會對此股有一定支持。
兆晉國際（491）發行1560萬元可換股債券集資，用作擴充業務，昨日股價一度急升逾12%，其後又俾人質到幾乎原地踏步，收0.165元，升幅收窄至1.23%。
黑客話，市場曾經傳出和黃（013）可能會入股兆晉，所以有唔少人一早就走去掃貨，但最後發現呢批可換股票據係發予FaiTatHoldingGroupLimited，而且可兌換之股份數目只佔擴大後股本1.32%。當市場發覺唔係傳聞中嘅和黃入股之際，已經有大戶力沽。
據聞早前認購兆晉一批認股證嘅大戶開始出貨。公司曾發行逾13億份認股證，每份作價2仙，行使價0.12元，總行使成本0.14元，噚日兆晉高見0.183元，當然有人沽貨獲利。
阿 虎